Scuol investescha passa 6 milliuns francs il 2017

Il preventiv da la vischnanca da Scuol per il proxim onn serra cun ina perdita da radund 250’000 francs; quai tar entradas totalas da radund 43 milliuns francs. Plinavant vul la vischnanca da Scuol far il 2017 investiziuns da 6,17 milliuns francs. La radunanza communala ha approvà il preventiv.

La fatschada da la chasa communala a Scuol. Avrir maletg en lightbox.

Legenda da maletgs: La fatschada da la chasa communala a Scuol. ANR (archiv)

Plinavant ha la radunanza communala decis da sustegnair la Gurlaina SA cun in emprest da 600’000 francs. Il Bogn Engiadina survegn ils onns 2019 e 2020 ina prefinanziaziun da 1,3 milliuns francs.

Las Pendicularas Scuol SA survegnan da la vischnanca da Scuol ina garanzia per ils 2 milliuns francs emprest dal chantun per il project d’ennavar.

Credits per investiziuns

A la radunanza èn ultra da las decisiuns qua sura vegnids approvads ils suandants credits per investiziuns:

  • Pumpiers: autos da pichet per Guarda e Sent, CHF 250’000
  • Via Crusch – Sur En da Sent, CHF 700’000
  • Via da Vallatscha, Tarasp, CHF 450’000
  • Nov tractor cun fargun pel mantegniment, CHF 280’000
  • Provediment d’aua: colliaziun Scuol-Vulpera, CHF 1’600’000
  • Aua e chanalisaziun Chaschiners, Scuol, CHF 200’000
  • Project Clozza, Scuol (en connex cun las malauras 2015), CHF 1’500’000
  • Via forestala Uina Punt Lunga, Sent, CHF 200’000
  • Pendicularas Scuol SA: contribuziun pel project d'ennavar sin il territori da Ftan, CHF 1’140’000
  • Center da passlung, Scuol, CHF 300’000
  • Provediment d'aua Val Lischana, Scuol, CHF 100’000

RR novitads 06:00