Il pretsch da cumpra munta a 12,7 milliuns francs. La decisiun vegnia surprendent, tant per la vischnanca da Scuol sco era per il represchentant legal da la societad da possessurs, scriva la gasetta. Sch'il hotel vegnia vendì u laschà a fit, è anc avert, uschia la societad da possessurs dal Scuol Palace.
Ina proprietad da luxus cun in'istorgia da 150 onns, uschia vegnia fatg reclama per l'object. Tranter auter mussia quella la sala da mangiar dal 19avel tschientaner, l'entrada cun in palantschieu sura fitg aut. Las chombras sajan renovadas e cleras. La surfatscha da l'hotel dumbria passa 6'000 meters quadrats. Latiers vegnian pli che 3'400 meters quadrats per residenzas e villas en il parc.
Fundaziun Nairs ha tut tenor interess
Christof Rösch, directur e cussegliader artistic dal center per art contemporan Nairs, ha ditg envers la gasetta Suedostschweiz ch'el na possia anc betg dir, sche la Fundaziun Nairs haja interess. L'emprim stoppia il cussegl da fundaziun seser ensemen. L'interess per l'entir Scuol Palace pudess esser avant maun. Gia avant onns aveva la fundaziun tschentà ensemen in concept, co ins pudess nizzegiar l'entir areal. La sedia da la fundaziun Nairs è en l'anteriur bogn dal stabiliment da cura istoric Scuol Palace.
RR novitads 06:00
