Il project Motta Naluns che prevesa da sanar e renovar il restaurant existent sin la muntogna sur Scuol exista gia dapi passa 10 onns. Dentant hajan las pendicularas mess ils ultims onns prioritad sin l’ennavaziun ed investì là ils ultims onns 12-13 milliuns francs.
Uss avant ch’investir en la renovaziun d’in ulteriur implant fetschia nair da basegn da modernisar il restaurant existent, uschia il president dal cussegl administrativ da las pendicularas, Andri Lansel.
Las pli grondas sfidas tar quest project èn il squitsch da temp, la finanziaziun, la logistica ed il viadi pretensius da transport sin la muntogna.
Il project da 15,5 milliuns francs vulan las pendicularas finanziar dad ina vart tras in institut da finanzas, stgars 5 milliuns duain vegnir ord agens meds e l’atgna cassa ed atgnas prestaziuns.
Igl è pli impurtant da finalmain pudair fabritgar e realisar il nov edifizi cun restaurant e tecnica che la finamira da resguardar be la mastergnanza indigena.
Per tegnair en il plan da finanziaziun sajan las pendicularas avisadas da dar la lavur al pli favuraivel. Perquai vegnian las lavurs tut tenor er surdadas ad interpraisas ordaifer la val, uschia Andri Lansel.
La dumonda da construcziun per il project duai esser pronta per quest atun. Previs èsi da cumenzar proxima stad cun las emprimas lavurs da conturn. L’avertura dal nov restaurant si Motta Naluns duai esser il december dal 2024.
Or da l'archiv
2014: Suenter ina stagiun da skis da success vulan las pendicularas Motta Naluns investir 25 milliuns francs en ina nova sutgera ed en ina nova ustaria.
