Ils da Scuol vulan surprender la lescha da transparenza chantunala er sin nivel communal. La decisiun a l'urna è stada clera: 1'053 votantas e votants han ditg Gea a l'iniziativa, 394 Na. La cuntraproposta che la vischnanca aveva elavurà n'ha gì nagina schanza. Er la radunanza communala aveva decis da sustegnair l'iniziativa e cunquai la varianta analoga a quella dal chantun.
Dumeng Bischoff, ch'è in dals iniziants sa mussa fitg cuntent d'avair cuntanschì la finamira. Durant l'entir cumbat da votaziun n'hajan ils iniziants mai laschà luc – retrair l'iniziativa na saja mai stà ina opziun.
Nus avain fatg l'iniziativa per las generaziuns futuras, per che lezzas hajan ina buna basa per far politica.
Il president communal Christian Fanzun ha quintà ch'i vegnia fitg stgars. En pli hajan ils iniziants mussà grond engaschi per mobilisar votantas e votants e quai n'haja la vischnanca betg fatg, di il president. La finala haja er la suprastanza vulì dapli transparenza sin nivel communal, er sche lezza ha proponì la cuntraproposta. Ma sper la lescha da transparenza dovria er ulteriuras mesiras per puspè survegnir la fidanza da la populaziun, uschia dettia da nov per exempel missivas da radunanzas communalas.
Nus stuain optimar la situaziun per che la populaziun stat davos la suprastanza. Uschiglio smetta la suprastanza l'onn che vegn e lura avain nus in auter problem.
Constituziun communala vegn midada
En pli han ils da Scuol decis da reveder la constituziun communala, quai cun 71% da las vuschs. I va per detagls cura e co las candidaturas per elecziuns vegnan publitgadas ed ina precisaziun en connex cun iniziativas e cuntrapropostas communalas.
