En il Lai da San Murezzan èsi da curt vegnì fatg ina scuverta extraordinaria. El cuntegn medusas d'aua dultscha. Medusas che derivan oriundamain da la China, quai rapporta il portal online «20 Minutas» sa basond sin ina communicaziun.
Fatg la scuverta ha in triatlet dal Vad durant ina challenge nua ch'el ha traversà lais da muntogna svizzers e latiers rimnà provas da l'aua. Las analisas da DNA cumprovan entant la scuverta en il Lai da San Murezzan. Il guardia-pestga engiadinais Linard Jäger è stà surprais da la scuverta. Dentant relativescha el er quella.
Da quests animals han ins er gia chattà savens en auters lais en Germania, surtut en lais che daventan fitg chauds. Savend che l'aua dal Lai da San Murezzan è adina magari fraida, dubitesch jau ch'il svilup da questas medusas fiss uschè grond ch'i dess in problem.
Las medusas en il Lai da San Murezzan derivian oriundamain da la China. Arrivadas en l'aua en Engiadina sajan ellas pli probabel tras ils sgols dad utschels da passagi, sco per exempel las andas, ha declerà Linard Jäger. Auter che las enconuschentas medusas da la mar, sa tractia tar questa sort dad animals pitschens che creschan ad ina grondezza da var 2 centimeters. Els na sajan era betg privlus per ils umans.
Las medusas cumparan savens en grondas quantitads e pon avair ina influenza sin la chadaina da nutriment indigena.
