Siglir tar il cuntegn

Header

Navigaziun

Spital da l'Engiadin'Ota.
Legenda: RTR, Georg Luzzi
cuntegn

Engiadina Sectur da sanadad en Engiadin'Ota vegn reorganisà

La reorganisaziun dal sectur da sanadad en Engiadin'Ota para dad esser sin buna via: Cun preschentar statuts surlavurads spera la fundaziun dal Provediment da sanadad Engiadin'Ota SGO ch'ils conflicts pervi da la reorganisaziun sa schlian.

La proposta ch'è vegnida preschentada oz mesemna duai en il meglier cas metter fin ad ina dispita che dura gia dus onns. Dapi il 2017 discuta numnadamain l'Engiadin'Ota co reorganisar il provediment da sanadad.

Cumenzà ha tut l'istorgia in december 2017. Il cussegl cirquital Engiadin'Ota aveva decis quella giada da transfurmar l’ospital Samedan e la Chasa da tgira Promulins en la fundaziun Provediment da sanadad Engiadin'Ota.

Il crap da stgarpitsch: ils statuts da l'organisaziun nova

Ils statuts, che furmavan la basa da la nova organisaziun giuridica dal provediment da sanadad, apunta da la fundaziun, èn vegnids suttamess ad ina votaziun dal pievel e vegnids acceptads.

Curt suenter han cumenzà las discussiuns. La raschun per quellas: Ils statuts da la fundaziun sajan vegnids midads suenter la votaziun uschia ch'els na correspundian betg pli a la voluntad dal pievel.

Da la discussiun a la dispita giuridica

La discussiun è platgada l'onn passà sco dispita giuridica avant dretgira: Cunter ils statuts novs han la suprastanza communala da San Murezzan e differentas persunas privatas inoltrà il schaner 2018 in recurs tar la Dretgira administrativa dal Chantun Grischun.

Ils puncts dal recurs

Personen-Box aufklappenPersonen-Box zuklappen
  • Il circul d’Engiadin’Ota ch'è vegnì schlià la fin da schaner 2017, n'haja betg la cumpetenza da decider sur da la realisaziun da la nova fundaziun provediment da sanadad Engiadin’Ota.
  • Il statuts ch'èn vegnids consentids dal circul n'èn betg valabels, perquai che quels na sajan betg vegnids approvads da la populaziun.
  • Il cussegl administrativ da la nova fundaziun stoppia vegnir relaschà, quel na saja betg autorisà da manar ils affars.

Quella ha tractà cun tut ils pertutgads ed ha sistì la procedura da recurs – e la fundaziun ha survegnì la lezia dad adattar ils statuts. Sch'ils recurrents sajan satisfatgs cun quellas midadas na saja ina sentenzia giudiziala betg pli necessaria, aveva argumentà la dretgira.

L'adattaziun giavischada è uss sin maisa

La fundaziun ha adattà ils statuts e ses cussegl da fundaziun ha acceptà els en sia sesida dals 4 d'avrigl. Questa decisiun ha il cussegl da fundaziun dal Provediment da sanadad Engiadin'Ota u per tudestg «Stiftung Gesundheitsversorgung Oberengadin SGO» publitgà oz mesemna.

En la communicaziun a las medias fa il cussegl a savair ch'ils statuts adattads regleschan da nov la structura dal cussegl, il temp d’uffizi ed er la furma d’eleger ils cussegl.

Emprima reacziun dals recurrents

Cun avair acceptà l'adattaziun dals statuts e dad in reglament d'organisaziun saja uss il cussegl da fundaziun da buna speranza che «nagut n'impedeschia pli ils recurrents privats e la vischnanca da San Murezzan da retrair lur recurs».

Quels hajan gia signalisà dad esser pronts da far quai, scriva il cussegl da fundaziun en sia communicaziun.

Payer succeda Ratti

Cun quai ch'i saja uss reussì da far la midada da las structuras cirquitalas tar la fundaziun haja er annunzià Gian Duri Ratti da sa retrair sco president dal cussegl administrativ, scriva il cussegl da furmaziun en sia communicaziun.

Sco nova presidenta dal cussegl administrativ è vegnida tschernida Gabriela Payer.

RR novitads 12:00