Envidà a l'inscunter ha il president da la Confederaziun Alain Berset. L'accent principal dals discurs sa numnan «partizipaziun culturala» e l'access a cultura, ha declerà Berset.
Da la partida èn il gronduca da Luxembourg, il prinzi ereditar Alois da Liechtenstein, il retg da la Belgia ed ils presidents da l'Austria e da la Germania. Il 2012 era la Svizra l'ultima giada ospitant da «l'inscunter da sis», lura era quel a Cuira.
Preparà uschè bain sco pussaivel sin las visitas
Era sche mintga giast duai vegnir tractà e maldisà en l’hotel da 5 stailas, ha il fatg ch’i sa tracta da regents en chasa, anc ina giada insatge pli spezial. Quai ha confermà Patrick Dietrich, il co-directur da l’Hotel Waldhaus a Segl.
Ch’els s’hajan preparads uschè bain sco pussaivel sin las visitas illustras. E perfin trenà co titular mintgin. Sper ils presidents da la Germania e l’Austria, Walter Steinmeier ed Alexander van der Bellen, è numnadamain er stà d’emprender ch’il gronduca Henri da Luxemburg e sia dunna la gronduca Maria Teresa vegnan numnads «Königliche Hoheit». Il prinzi ereditar Alois von und zu Liechtenstein percunter: «Durchlaucht»
Finalmain è quai glieud tut normala, sco ti e jau !
Durant dus dis saja il program da tut ils emploiads da l’hotel sur Segl stà pli spezial ed er intensiv, tut haja gì dad esser pront e terminà sin la minuta, ha tradì l’hotelier, cuntent che tut ha funcziunà tenor plan.
Cultura omnipreschenta
Ideal saja er stà ch’il tema da l’inscunter: la participaziun culturala, sa cunfetschia bain cun la filosofia da Segl e surtut cun l’hotel Waldhaus. Uschia han las dunnas dals regents er visità durant lur program spezial per exempel la chasa da Friedrich Nietzsche.
L’inscunter dals regents dals sis pajais ha lieu dapi il 2004 e vegn organisà alternant en ils differents pajais da lingua tudestga. La davosa sentupada dals schefs da stadi è stada dal 2012 a Cuira.
RR novitads 17:00