Siglir tar il cuntegn

Header

cuntegn

Segl-Föglias – Plaun da Lej Mesiras da segirezza per via da Malögia

La via da Malögia è periclitada tranter Segl-Föglias e Plaun da Lej, perquai ch'i dat adina puspè lavinas sin la via. La via chantunala sto perquai adina puspè vegnir serrada per raschuns da segirezza. La schliaziun cun in tunnel duai schliar il problem a lunga vista. Entant duain intginas mesiras procurar per segirezza.

  • Il project cumpiglia il territori da la vischnanca Segl, da la vart sanestra da la val, survart la via chantunala Silvaplauna – Castasegna.
  • Il traject è ca. 3,5 kilometers lung.
  • 14 tratgs da lavinas pericliteschan la via sutvart.
  • L'entira spunda è drizzada direcziun sidost ed è per la pli gronda part pli taissa che 35°.

Concept da mesiras

Enfin ch'il tunnel planisà è installà e po vegnir duvrà, po quai anc ir onns. Perquai ha l'institut da naiv e lavinas elavurà in concept da mesiras sin dumonda da l'Uffizi da construcziun bassa. Il concept prevesa da construir pitgas da siglientar lavinas per pudair provocar a moda controllada las lavinas en ina part da la costa. Cura ch'il tunnel fiss lura en funcziun, pudessan questas pitgas vegnir installadas en in auter lieu. Plinavant duai dar in radar a lunga distanza che duai registrar a moda automatica las lavinas e quai independent da las cundiziuns da l'aura.

ina carta da la situaziun sur la via.
Legenda: Uffizi da construcziun bassa

Questas mesiras augmentian a moda signifitganta la segirezza. Plinavant duai l'hotel Chesa Grischa ch'è periclità entras las lavinas vegnir segirà a moda separada. Ils custs per quest pachet da mesiras èn tar radund 1,57 milliuns francs e vegnan surpigliads da chantun e Confederaziun.

Enfin ils 24 da mars è il project publitgà. Suenter ch'il project è approvà duai quel vegnir realisà l'atun 2022. Enfin l'enviern 2022/23 duai il project lura esser installà.

audio
Per tadlar curt e cumpact
ord RTR Audio dals 24.02.2022.
laschar ir. Durada: 1 minuta 21 Secundas.

RTR novitads 10:00

Artitgels legids il pli savens

Scrollar a sanestra Scrollar a dretga