Ord vista finanziala na dettia quai anc betg squitsch da fusiunar tar las trais vischnancas sisum l’Engiadin’Ota, Segl, Silvaplauna e San Murezzan. Tuttina vulan las trais vischnancas sa preparar per l’avegnir. Perquai han la presidenta communala da Segl ed ils presidents da Silvaplauna e San Murezzan elavurà l’ultim onn e mez differents scenaris per ina cooperaziun da las trais vischnancas.
Dapli arguments per fusiun, però betg realistic
En dumonda vegniss ina fusiun ubain ina collavuraziun intercommunala. Er sch’i dat dapli puncts che discurran per ina fusiun tenor la survista preschentada, tema la gruppa da lavur che quel pass na fiss per il mument betg realistic. Percunter fiss ina collavuraziun intercommunala sin plirs secturs in emprim pass per instradar ina furma futura da las trais vischnancas dals lais.
Spargnar temp cun eliminar dublettas
Sco Christian Jott Jenny, il president communal da San Murezzan, ha ditg a l’infurmaziun publica, existan oz numerusas dublettas tar ils process communals. Tras ina collavuraziun intercommunala pudess ins facilitar quai en l'avegnir ed uschia spargnar temp e sedutas.
Sentir il puls tar la populaziun
La populaziun da Segl, Silvaplauna e San Murezzan survegn quests dis posta da la vischnanca cun in questiunari en chaussa. En in proxim pass duain vegnir valitads ils questiunaris per savair, en tge direcziun ch’i duai ir cun las trais vischnancas dals lais.
