Adina puspè haja dà discussiuns intensivas tranter la suprastanza da l’organisaziun privata Segl Turissem e la suprastanza communala da Segl. Colliads èn ils gremis cun ina cunvegna da prestaziun da l’onn 2007. Tenor l’organisaziun turistica haja ina dieta da strategia demussà, ch’in svilup turistic na saja cun quellas premissas betg pussaivel.
La vista da la vischnanca
Per la presidenta communala da Segl, Barbara Aeschbacher vegnian las desditgas nunspetgadas. Ella haja bain resentì ina tscherta malcuntentientscha. Perquai haja la vischnanca offrì da surlavurar ed adattar la cunvegna da prestaziun. Ina resposta sin quella proposta na haja ella fin oz però betg survegnì.
Tenor la communicaziun da Segl Turissem vegnia elegida ina nova suprastanza la stad che vegn en occasiun da la radunanza dals commembers.
