Roman Federspiel da Müstair ha gudagnà l'elecziun en la suprastanza communala da la Val Müstair. Federspiel che ha 39 onns ed è cussegliader d'assicuranza ha cuntanschì 520 vuschs. Sin las plazzas 2 fin 4 seguan 3 suprastants en uffizi: Gian Duri Conrad cun 488 vuschs, Aldo Rodigari cun 486 vuschs e Gabriella Binkert Becchetti cun 415 vuschs. Els èn reelegids. Ils ulteriurs candidats n'han betg cuntanschì la maioritad absoluta da 313 vuschs, tranter els era ils suprastants en uffizi Gian Tschenett ed Aldo Pitsch. Aldo Pitsch è cun 226 vuschs be gist rivà sin la penultima plazza dals 11 candidats. Ils candidats novs Hansjörg Weber (312 vuschs) e Cla Filip Pitsch (306 vuschs) han manchentà la maioritad absoluta be per paucas vuschs.
Il segund scrutin per las ultimas 2 plazzas en la suprastanza communala è ils 27 november.
RR novitads 15:00