Otg persunas han pers lur vita ils 23 avust 2017 durant il viadi sin la senda da Bondo en direcziun chamona Scora. Ina bova da radund 3 milliuns cubics è crudada dal Piz Cengalo – las unfrendas en scumparsas.
Tenor retschertgas che la schurnalista grischuna Stefanie Hablützel ha fatg per la gasetta «Beobachter» han il chantun sco er la vischnanca savì dal privel. Quellas retschertgas mussan che las autoritads vulevan gia spustar la senda privlusa avant la bova. Quai n'è però mai capità.
Perquai che la prodecura penala n'è anc betg terminada na prenda il chantun betg posiziun. Per l'emprima giada è il president communal da Bregaglia Fernando Giovanoli s'exprimì en chaussa. El di che suenter sajan ins adina pli furber.
Ins sto dir, guardond uss enavos èn tuts pli furbers. Anc il 2017 era quai tut in’autra situaziun. Nus avevan er in’autra visibilitad e sensibilitad. Tut ils uffizis chantunals e federalas, organisaziuns per la protecziun da l’ambient avevan in’autra tenuta.
Project per senda nova
Uss datti dentant in nov project ch'è gia planisà e lubì. La nova senda vegn a custar radund 1,2 milliuns francs, ha ina lunghezza da 4 kilometers e 4 punts per surmuntar lieus privlus. La finanziaziun n'è anc betg garantida. Sche tut va tenor plan èsi previs da realisar la senda l'onn 2023.
