Cun il concert da la messa da jazz «Missa Rotna», scritta da Bent Peter Holbech, han ils radund 40 chantadurs e chantaduras vulì onurar lur dirigent Jachen Janett per ses engaschament per il chant e per la musica a favur dals anteriurs seminarists.
L’inscunter a Sent haja gista gì trais buns motivs, han suttastritgà ils trais iniziants dal project, Andri Gritti, Curdin Lansel e Gianna Bettina Gritti. Cun reunir diversas annadas da l’anteriur Preseminari Ladin a Samedan ed auters absolvents da la scola media, han els era laschà reviver il chant dal chor da la scola. Ultra da quai èn ils chantadurs e las chantaduras era sa scuntradas per ina sort da reuniun da las classa a Sent cun lur anteriur magister e dirigent.
Quatter giadas s’èn las magistras ed ils magisters scuntrads per ina prova da chant. Per quellas sajan els vegnids da tut las varts pussiblas a Sent, uschia Andri Gritti, il co-iniziant dal project. Il concert «La Missa Rotna reviva» cun la messa da jazz ed autras chanzuns – era rumantschas – è vegnì accumpagnà musicalmain e cumplettà dals solists Sara Bigna Janett e Georg Fluor.
Or da l'archiv:
