Sonda da Pasca la saira hai dà in incendi en ina chamona a Sent. In abitant da la chamona è vegnì sgulà a val tras la Rega.
Curt avant las 21:00 haja l’abitant da la chamona annunzià ch’i saja rut ora fieu en la tegia da chatscha, scriva la Polizia chantunala. Ils pumpiers da Pisoc èn entrads en acziun cun 20 persunas, n’han dentant betg pudì cuntanscher il lieu d’incendi pervi da la situaziun da la naiv. Ina crew da la Rega ed in um dal salvament alpin han chattà l'um e sgulà quel cun suspect sin ina tissientada da gas da fim en l'opital Engiadina Bassa a Scuol.
Dumengia èn ils pumpiers sgulads cun helicopter al lieu da donn. La chamona era brischada dal tuttafatg, sut il tetg da sturs era dentant anc avant maun in brasclim, sinaquai è vegnì laschà giu aua da stizzar cun agid d'in helicopter. La Polizia chantunala dal Grischun sclerescha la raschun da l'incendi.