La conferenza dals presidents communals da la regiun Malögia - quai èn las vischnancas da S-chanf enfin Bregaglia - ha elegì il president communal da San Murezzan Sigi Asprion sco president ad interim per la regiun nova. Asprion ha fin la fin da l'onn 2015 in pensum da 10% u 2 dis per mais. Substituta dad Asprion è la presidenta communala da Bregaglia Anna Giacometti. Elecziuns regularas per la suprastanza da la regiun Malögia datti lura suenter che ils statuts da la regiun èn en vigur.
En pli ha elegì la conferenza dals presidents communals ils commembers da trais cumissiuns: Duri Campell, Ladina Meyer, Jakob Stieger e Flurin Wieser furman la cumissiun da persunal. Jon Fadri Huder, Christian Meuli e Claudia Troncana èn la cumissiun da finanzas. Martin Aebli, Christian Brantschen e Roberto Zanetti èn la cumissiun per il svilup dal territori.
Votaziun davart statuts terminadas enfin fanadur
6 vischnancas han gia votà davart ils statuts per la nova regiun Malögia. L'autra mesadad da las vischnancas fa las votaziuns davart ils statuts enfin il cumenzament da fanadur.
La nova regiun Malögia vegn furmada en connex cun la refurma da territori che la populaziun grischuna ha decidì la fin da l'onn 2014.
