Silvaplauna decida en sia proxima radunanza communala tgi che vegn ad esser en ils gremis per la perioda d’uffizi dal 2026 fin il 2028. En la suprastanza cun sis sezs, sa mettan duas persunas ch’èn en uffizi anc ina giada a disposiziun per il proxim trienni. Quatter cussegliers e cusseglieras han da bandunar la suprastanza communala la fin da quest onn, causa avair cuntanschì il temp da limitaziun d’uffizi da 12 onns.
Fitg grond interess
Per in sez en suprastanza èn s'annunziadas – sper las duas effectivas – otg novas persunas. La radunanza communala da Silvaplauna ha pia ina gronda schelta, quai che fetschia grond plaschair al president communal, Daniel Bosshard e saja er il merit da la lavur dals ultims onns.
Che gist tantas persunas han interess d'in dals sezs vacants en suprastanza, è in cumpliment per nossa lavur prestada ils ultims onns.
La vischnanca da Silvaplauna ha introducì avant 9 onns il model da direcziun. Quel maina tut las fatschentas operativas, la suprastanza è responsabla per las dumondas strategicas. Quai haja segir dà distgargia a la lavur da la suprastanza, uschia Daniel Bosshard. Che l’uffizi fiss finanzialmain cun ina paja da var 3’000 francs l’onn attractiv, na craja il president communal betg. I saja pli la cuminanza ed il plaschair da vulair muventar insatge en vischnanca.
Per il cussegl da scola però nagin interess
Entant ch’i dat ina lunga glista da persunas per la suprastanza communala, èn tenor communicaziun da la vischnanca per entant gist trais da quatter sezs vacants per il cussegl da scola. Daniel Bosshard è dentant persvadì ch’i vegnia a dar candidatas e candidats er per quest gremi en in segund scrutini.
En tut cumpiglian las tschernas communalas da Silvaplauna 21 sezs d’uffizi ch’èn d’occupar per ils proxims trais onns. La radunanza communala è il venderdi, ils 28 da november 2025.
Daniel Bosshard era gia vegnì reelegì il zercladur sco president communal per in ulteriur trienni.
