Empè dad ir al mar duain ils turists far vacanzas en las muntognas questa stad. En Engiadin'Ota duain els tuttina sa sentir in pau sco a la mar. Uschia fa la destinaziun turistica Engiadina San Murezzan reclama per questa stad.
Fitg activa è era la vischnanca da Silvaplauna. Ella ha mess ad ir diversas offertas supplementarmain a las offertas ch'existan gia. Uschia regala la vischnanca a 200 uffants u giuvenils curs da wind- e kitesurf. Sa participar po tgi che stat almain 5 notgs a Silvaplauna.
Parcadis sco campadi
Silvaplauna ha era decis da metter a disposiziun dus parcadis per campaders. Quai perquai ch'il campadi dat a fit mo plazzas fixas questa stad. Campaders senza bogn pon damai parcar sin il parcadi gista dasper il campadi, campaders cun bogn tar la staziun a val da la pendiculara Corvatsch. Quai per 35 francs per notg.
La suprastanza communala ha mess a disposiziun per questas offertas supplementaras 200'000 francs.
Nagina concurrenza a la destinaziun
Il capo da Silvaplauna, Daniel Bosshard, intuna ch'i na dettia betg in cler cunfin tranter il marketing da la destinaziun turistica e las offertas supplementaras da Silvaplauna. Ins haja ina fitg buna collavuraziun. Il biro da turissem da la vischnanca haja l'incumbensa da vender offertas che portian ina plivalur per Silvaplauna.
