Discutà han ils votants surtut davart il concept da traffic che prevesa ch'ils bus circuleschan en l'avegnir definitivamain mo pli sur la via chantunala e betg pli tras la vischnanca. Quai è gia uss il cas provisoricamain pervia da la sanaziun da lingias en vischnanca.
Ina proposta per ina fermada davant la butia communala han ils votants dentant tuttina refusà. Quella fiss mo stada pussaivla cun cumprar terrain privat ni expropriar ils possessurs.
Per 5.35 milliuns francs realisescha Silvaplauna uss damai ina nova plazza communala e novas fermadas da bus tar il campadi e tar il rondel tranter Silvaplauna e Surlej sin la via chantunala.
Ulteriuras decisiuns
En pli ha il suveran acceptà la revisiun da la constituziun communala. Cun quai vegnan leschas, ordinaziuns e communicaziuns puspè era translatadas per rumantsch. Quest midament ha Silvaplauna stuì far suenter che la regenza chantunala aveva refusà il midament da la constituziun dal avust 2016.
Il suveran ha ultra da quai approvà la revisiun da la lescha davart las taxas da turissem. La revisiun era necessaria pervia dal midament dal circul a la regiun Malögia.
RR novitads 6:00
