Engiadina - Silvaplauna vuscha ils 9 mars davart l'imposta da 2. abitaziuns

La vischnanca da Silvaplauna ha publitgà las tractandas ed il messadi per la radunanza communala dals 9 mars. Tema principal è l'imposta da segundas abitaziuns. Ina iniziativa pretenda dad abolir dil tuttafatg l'imposta che la vischnanca vulaiva oriundamain introducir l'onn 2015. La cuntraproposta da la suprastanza communala prevesa da reducir il dumber da dis che ina abitaziun sto esser occupada per vegnir deliberada da l'imposta. Sche ina abitaziun è occupada durant 45 dis l'onn stuess il possessur anc pajar la mesadad da l'imposta, sche l'abitaziun è occupada dapli che 90 dis vegniss il possessur deliberà da l'imposta. En il messadi argumentescha la suprastanza communala en pli che l'import per la nova taglia e per la taxa da cura a Silvaplauna fiss congualabel cun quai che possessurs da segundas abitaziuns pajan en autras vischnancas.