Siglir tar il cuntegn
cuntegn

Engiadina «Snow-Deal» – tgi che na reserva betg patescha

Suenter in mez onn pretschs flexibels per ir cun skis in Engiadin'Ota, tiran ils responsabels in facit cuntentaivel

Legenda: Guardar il video «Snow-Deal» - la bilantscha. Durada 03:35 minutas.
Or da Telesguard dals 30.01.2019.

Las pendicularas en l'Engiadin'Ota han tratg bilantscha da lur nova purschida dals pretschs dinamics – il «Snow-Deal».

Famiglias profiteschan ...

Las analisas conferman che surtut famiglias han profità. Quellas reservan a temp lur vacanzas, en in temp nua ch'ils pretschs èn stads bass.

In exempel: Ina famiglia cun 3 uffants ha reservà ils 29 schaner per 6 dis (18 – 23 favrer). Cun il model Snow-Deal pajan els 772,40 francs. L'onn passà avess la medema purschida custà 965 francs.

... skiunzs spontans pateschan

Il skiunz spontan ch'è ì cun ils skis ils ultims dis da december ha pajà 105 francs per in di sin la pista. Las pendicularas ed era la destinaziun turistica han survegnì differentas reclamaziuns.

In exempel: Ina persuna singula che riva a la cassa ha pajà ils 29 december 105 francs per ina carta dal di. Avess ella reservà il settember online, avess ella pajà 72 francs. L'onn passà avess ella pajà per la medema purschida 82 francs.

Omadus, saja quai Markus Meili il maina gestiun da Engadin St. Moritz Mountains SA sco era Gerhard Walter il CEO da Engadin St. Moritz Tourismus SA en persvas dal nov sistem cun pretschs flexibels.

Las reclamaziuns vulan els prender serius. La communicaziun duai daventar pli intensiva, saja quai en Svizra u en il pajais esters. Uschia che mintgin è infurmà e po reservar las vacanzas a temp.

Ina survista da «Snow-Deal»

  • 53% dals giasts ch'han reservà ina carta da skis per plirs dis han pustà quella online e profità da «Snow-Deal».
  • In terz da tut las cartas insumma (cartas da di e da plirs dis) vegn oz reservà online.
  • Cun il «Snow-Deal» van ils giasts in di dapli sin pista (empè da 5 nov 6 dis)
  • Sulettamain 11% han reservà online ina carta dad in u mez di. La maioritad va anc adina a la cassa. Il pretsch en media e causa a quai in zichel pli aut cumpareglià cun l'onn passà.

RR actualitad 17:00