Snowboard alpin - Chalzers Jauers glischan als gieus Olimpics

04:33

video

Chalzers d'aissa Jauers glischan als gieus Olimpics

Or da Telesguard dals 18.02.2022.

laschar ir. Durada: 4 minutas 33 Secundas.

Avant tschintg onns – curt avant ils ultims gieus Olimpics – è vegnì sin il martgà l’emprim chalzer mellen glischent, sviluppà da la firma Mountain Slope en Val Müstair. Hansruedi e Jennifer Ammann èn ils proprietaris da Mountain Slope. Hansruedi Ammann era sez profi snowboardist ed è vegnì tras quai sin l’idea da sviluppar in chalzer.

Legenda: Tim Mastnak da la Slovenia (argient), Benjamin Karl da l'Austria (aur) e Victor Wild da la Russia (bronz): Els tuts van cun ils chalzers da la Val Müstair. Keystone

Plastic da la EMS Chemia

Ils chalzers han success. Als gieus Olimpics a Peking èn idas tschintg da sis medaglias ch’i ha dà en il snowboard alpin ad atletas ed atlets cun ils chalzers mellens. Il recept da success saja il material artifizial spezial, di Hansruedi Ammann. Quel saja vegnì sviluppà da la EMS Chemia, aposta per quest chalzer e restia tar temperaturas autas u bassas adina medem dir.

Legenda: Jennifer e Hansruedi Ammann èn ils chaus davos ils chalzers da Mountain Slope RTR, Dario Müller

Pes d’uffants en mira

Il chalzer che vegn construì a Treviso en l’Italia, ha gì success davent da l'entschatta. Uss vulan Jennifer e Hansruedi Ammann sa concentrar sin pes pli pitschens. En l'avegnir duai pia dar er chalzers en grondezzas sut il 35.