Siglir tar il cuntegn

Header

cuntegn

Engiadina Soluziun interna per la scola da muntogna Avrona

La scola da muntogna Avrona ha reglà la successiun. Enstagl da tschertgar in manader han ins chattà ina soluziun interna.

Amez il guaud en vischinanza dal vitg da Scuol sa chatta la scola da muntogna Avrona, che sa basa sin la pedagogia da Rudolf Steiner. Ina scola per uffants cun basegns d’urgenza che duain emprender a chattar enavos en la vita da mintga di. 15 uffants da la regiun ed era dad auters lieus visitan actualmain quella scola. Els vegnan sustegnids da radund 11 magistras e magisters.

Suenter ch'il manader Mayk Wendt aveva desdì la plazza sco manader da l’instituziun han ins tschertgà in nov manader, quel è restà sulettamain 6 emnas. Per surmuntar la situaziun vacanta, han ins surdà la responsabladad a 3 persunas ad interim.

Nizzegiar forzas ch'èn avant maun

Per ina sto il manader da la scola esser pront da viver giud via, davent dal puls e per l’autra sto el avair la scolaziun fundada pedagogica per manar quella scola. Durant il temp senza manader han ils commembers da la fundaziun chattà la soluziun. Pertge tschertgar lontan sch'era persunas che lavuran dapi onns ad Avrona han las capacitads da surprender quella lavur?

La lavur dal manader u manadra vegn dividida en trais parts. David Brodbeck surpiglia la part scolaziun, Maya Gasser la partiziun da tgira dals uffants e Sibylle Ovenstone maina l’economia dal manaschi e quai a partir d’immediat.

audio
Bunura: Soluziun interna per la scola da muntogna Avrona
ord Actualitad dals 18.04.2018.
laschar ir. Durada: 2 minutas 46 Secundas.

RR actualitad 08:00

Artitgels legids il pli savens