Chattar ina abitaziun pajabla per indigens, oravant tut per famiglias, è ina sfida en l'entira regiun Engiadin’Ota e Valladas dal Sid. Tenor la promotura regiunala Claudia Jann èn plirs facturs responsabels – tranter auter la situaziun da las abitaziuns secundaras, ma era il fatg ch'i vegn fabritgà damain abitaziuns adattadas per indigens.
La Regiun Malögia ha laschà elavurar in studi che duess mussar differentas vias per chattar soluziuns a lunga vista. Tenor Jann fissi era impurtant da stgaffir ina plattafurma per simplifitgar la tschertga d’abitaziuns adattadas, oravant tut per famiglias e giuvens.
L'idea da fundar ina cooperativa per construir emprimas abitaziuns fiss in'ulteriura via. Qua fissan dentant da sclerir bleras dumondas cumplexas, di la promotura regiunala. Per exempel las finanzas, u era co organisar la collavuraziun per ina tala cooperativa tranter pliras vischnancas.
La responsabladad resta cleramain tar las singulas vischnancas, la Regiun vul però coordinar ed evaluar strategias. Proximamain duess avair lieu in lavuratori cuminaivel, e sco basa duai ussa valair quest studi incumbensà da la Regiun Malögia.
