Siglir tar il cuntegn
Inhalt

Engiadina Stagiun auta a Scuol

La naiv è qua e las pistas, loipas, vias da viandar e da scarsolar èn preparadas. Co giran las fatschentas d'enviern? RTR fa visita a Scuol per sentir il puls al turissem durant la stagiun auta.

Plirs indicaturs mussan ch'i va puspè ensi cun il turissem d'enviern. Quai era grazia a la naiv ch'i ha dà gia baud quest onn. RTR sa maschaida tranter turists ed indigens e rapporta live da Scuol.

Mesemna a bun'ura ha RTR fatg in'intervista cun Sarina Heinrich a la staziun da lva da las pendicularas Motta Naluns. Ella è la figlia dal proprietari da la pli gronda butia da sport a Scuol, la «Sport Heinrich».

Durant la stagiun auta occupescha la butia fin a 13 emploiads. Envers RTR ha Heinrich confermà ch'adina dapli giasts prendian a fit ils skis u era ils chalzers enstagl da cumprar il material. In avantatg saja ch'ins haja uschia adina il pli nov material a disposiziun.

Visita tar scola da skis

Suenter il viadi sin la staziun sura, ha RTR gì la pussaivladad da far in'intervista cun il manader da la scola da skis, Cla Neuhaus. La preparaziun per la nova stagiun da skis saja stada pli u main la medema sco ils ultims onns. Quai cun excepziun che las duas scolas da skis da Scuol e Ftan sajan fusiunadas.

Malgrà che l'aura n'è betg uschè ideala, sajan ils scolars cumparids, uschia Neuhaus. Damai ch'i saja difficil da dir quants scolars che vegnian la finala sur ils dis da festa, dettia adina quatter fin tschintg magisters da skis sin reserva. Tenor basegn possia spontan dar dapli classas.

L'infrastructura dal center d'uffants porschia trais tschintas da transport per ils divers nivels dals novs skiunzs.

Di dals acziunaris a Motta Naluns

En il restaurant da muntogna «La Charpenna Motta Naluns» èn s’inscuntrads oz ils acziunaris da las pendicularas. Passa 80 acziunaris sajan stads preschents, ha ditg il nov directur da las pendicularas Andri Poo.

Suenter in mais en uffizi fa Poo bilantscha positiva. Grazia a la naiv che saja crudada gia baud, saja il cumenzament en la stagiun d’enviern reussida. La pli gronda sfida sco directur saja da manar ils passa 140 collavuraturs. En general n’haja betg dà grondas surpraisas, ha ditg il nov directur vinavant.

RR actualitad 08:00+