Suenter la stagiun d’enviern, l'avrigl, è arrivà il mument ch'ils hotels en l'Engiadina serran lur portas. La gronda part da las impiegadas e dals impiegads van en vacanzas – las vischnancas daventan perquai vidas e quietas.
Era il Grand Hotel Walther a Puntraschigna ha serrà sias portas. Mo fa l’hotel in sien da primavaira ni gira anc insatge davos ils mirs dal hotel tradiziunal dal onn 1907?
L’hotel da 4 stailas superiur vegn manà en terza generaziun da la famiglia Walther. Thomas Walther, il possessur actual, ha dà la pussaivladad da guardar davos ils mirs – ed i gira in mantun.
Lavurs da tut il gener
Il parchet en la lobby da l'onn 1907 vegn per exempel tgirà mintg’onn. El è ina perditga dal temp ed è anc original. L’hotel cun sias 102 stanzas n'ha actualmain era nagin stgaudament ni aua. Il motiv, il stabiliment survegnan in nov stgaudament – ina investiziun per l’avegnir. Cun tut las sanaziuns e lavurs dadens e dadora vegn investì questa primavaira il 56avel milliun en l'hotel da tradiziun.
Cumbinar tradiziun e moderna, quai è per Thomas Walther e sia famiglia fitg impurtant. Els na veglian betg esser in museum, lur hotel duai esser in lieu d’inscunter – in lieu, che tradiziun e moderna s'uneschan.
Per tut las lavurs ch'han da vegnir fatgas han els dus mais temp. Ils zercladur avra l’hotel puspè sias portas per ils giasts. Dimena d'in sien da primavaira na possian ins betg discurrer, di Thomas Walther. Tenor el fetschia l’hotel in sien da bellezza per traglischar per la stagiun e las generaziuns che seguan.