Siglir tar il cuntegn

Header

audio
Saira: È stalking er in problem en la rait?
Or da Actualitad dals 03.10.2018.
laschar ir. Durada: 3 minutas 32 Secundas.
cuntegn

Engiadina «Stalking» – amur u obsessiun?

Cas nua che persunas vegnan persequitadas e survegliadas dad auters daventan adina pli numerus. Radund 4% dals umens e 14% da las dunnas vegnan turmentads almain ina giada en lur vita da l’uschenumnà «stalking». In agir che ha savens da far cun ina reacziun, suenter la fin d’ina relaziun d’amur.

Ord spira dischillusiun e desperaziun ch’ina relaziun d’amur è a fin, turmentan persunas lur victimas. Persequità, surveglià ed adina sut controlla va sut la pel tar ils pertutgads, als fa tema ed er vegnir malsegir. Il pais psichic è enorm per ils pertutgads, vegn dentant adina puspè tabuisà e bagatellisà.

Sensibilisar la glieud

En connex cun ils dis d’acziun «Sanadad psichica» han la Chasa da dunnas Grischun, il club da Zonta Engiadina ed l’Uffizi da sanadad Grischun organisà ina sairada d’infurmaziun cun ina discussiun da podium davart il tema «Stalking». Quai oravant tut per infurmar e sensibilisar la glieud, ha suttastritgà la manadra da la Chasa da dunnas a Cuira, Bettina Melchior.

Stalking na dastgan ins mai bagatellisar!
Autur: Bettina Melchior Manadra Chasa da dunnas Grischun

Numerusas variantas da stalking

Entant ch’ins enconuscha tar radund 80% dals cas da stalking il muster tipic d’ina amur negligida, datti er tut autras furmas dal persequitar e chatschar ina persuna. Uschia ha la giurista e feminista turitgaisa Zita Küng raquintà durant la discussiun da podium sia istorgia persunala en connex cun stalking. In nunenconuschent haja empustà adina puspè rauba, viadis e perfin in tanc ieli sin il num da la dunna prominenta. Cun quai ch’ella na saveva mai, tge che la spetgass sco proxim, saja il viadi fin tar la chascha da brevs daventada adina pli pesant. Scuvrì e finalmain denunzià hajan ins il delinquent be grazia ad ina casualitad.

Fora en la lescha

Difficil fetschia er il fatg che stalking n’è en sa sez betg in delict, vul dir in fatg penal, ha precisà la giurista da Samedan, Claudia Nievergelt. Uschia dovri autras cumprovas che las victimas ston purtar. Da recumandar saja tenor il policist turitgais Armin Schönenberger en mintga cas, da scriver in uschenumnà diari da stalking, nua ch’ins documentescha tut las acziuns minuziusamain.

Il pli impurtant è da ramassar e documentar tut las acziuns dal stalker sco cumprova.
Autur: Armin Schönenberger Vice-schef gruppa delicts da violenza Turitg

Cyber-Stalking crescha

Cun la digitalisaziun ed il svilup en las medias socialas è sa sviluppada ina nova furma da stalking, nua che las retegnientschas èn anc pli bassas da turmentar ed observar ina persuna, causa ch’i na dovra betg in inscunter persunal. Cun paucs clics possian ils stalkers survegliar e tut tenor er ruinar in’entira vita.

RR actualitad 17:00

Artitgels legids il pli savens