Siglir tar il cuntegn

Header

cuntegn

Staziun Samedan Project per il center administrativ vegn persequità vinavant

Il project per il center administrativ dal chantun tar la staziun duai vegnir persequità vinavant, malgrà ch'il Tribunal federal ha dà raschun ad in recurs il december passà. Las trais partidas: la Viafier retica, il chantun e la vischnanca da Samedan, hajan tuttas confermà da far vinavant cun il project, er sche la decisiun giuridica retardeschia il plan.

Sco la vischnanca communitgescha giajan ins ussa la via sur ina revisiun da l'urden fundamental. Sco basa vegnia elavurà in project da test. En il center regiunal fissi planisà da metter sut tetg 11 servetschs dal chantun.

Recurs cunter il plan d'areal a la staziun

Set persunas ch'èn possessurs d'immobiglias vischinantas ed ina firma avevan fatg recurs cunter il plan d'areal a la staziun. Il Tribunal federal aveva sinaquai dà raschun ad els ed uschia schlià tant la decisiun da la Dretgira administrativa dal Grischun (december 2020) sco era il plan d'areal relaschà da la suprastanza da Samedan (november 2018). Ils surpassaments dal plan d'areal sajan da giuditgar pli sever, perquai ch'il plan saja vegnì decidì da la suprastanza senza votaziun a l'urna, sco il Tribunal federal ha declerà sia decisiun.

RTR novitads 12:00

Artitgels legids il pli savens