Cun in transport spezialisà èn las ovras da l’artist engiadinais rivadas da la Svizra franzosa en l’Engiadina. Per pudair examinar la posiziun da las fanestras en il tunnel, han ins fatg in rom cun in vaider spezial. Quel sumeglia ad in vaider ch’ins dovra en bancas, ha declerà il constructur en mettel Corsin Rauch ad RTR.
Glisch e glisch
La pli gronda sfida per installar endretg ils maletgs da vaider da Gian Casty en la passarella, saja l’illuminaziun da las ovras. Dad ina vart èn ils mirs da betun fraids cun lampas da alogen, da l’autra las fanestras da colur che dovran glisch per resortir endretg.
Er la reflexiun dal vaider ha dad esser al gist lieu, per ch’ils peduns che passan sperasvi ils maletgs cun il tarpun rudlant, vesian er las figuras che l’artist ha picturà.
Radiotelevisiun Svizra Rumantscha ha gia rapportà diversas giadas da l'artist. Guarda ils videos
Films e documentaziuns ord l'archiv da RTR davart Gian Casty
Emprest illimità
Il museum da vaider a Romont dat a la vischnanca da Zuoz las 5 fanestras sco emprest, però senza ina limitaziun da temp. Quai simplamain per segirar che las ovras na vegnian betg en ils fauss mauns, uschè Stefan Trümpler, il conservatur dal Vitromusée a Romont. Gian Casty che era creschì sì a Zuoz aveva creà las ovras per ina banca a Basilea ils onns 70. Suenter in incendi avev' ins salvà las fanestras e las regalà avant 4 onns al museum da vaider.
-
Bild 1 von 7. La fanestra da test en la vaidrina illuminada. Bildquelle: RTR, Anna Caprez.
-
Bild 2 von 7. L'emprima fanestra è posiziunada, dentant reflectescha la glisch anc memia ferm. Bildquelle: RTR, Anna Caprez.
-
Bild 3 von 7. Las 5 fanestras duain represchentar in spectachel en 5 acts. Bildquelle: RTR, Anna Caprez.
-
Bild 4 von 7. Corsin Rauch nettagia il vaider per vesair meglier la reflecziun da la glisch. Bildquelle: RTR, Anna Caprez.
-
Bild 5 von 7. L'Africa, ina da las fanestras da Gian Casty. Bildquelle: RTR, Anna Caprez.
-
Bild 6 von 7. Duas da las tschintg ovras dal pentagon da Gian Casty. Bildquelle: RTR, Anna Caprez.
-
Bild 7 von 7. La vaidrina da test è pronta per l'emprima fanestra da Gian Casty en la passarella. Bildquelle: RTR, Anna Caprez.
Vernissascha ed avertura
La nova chasa da parcar a Zuoz porscha bun 100 plazs per autos e duai gidar a tegnair il traffic or dal minz da la vischnanca. Las empraisas da construcziun èn vi da lavurs a l’intern dal edifizi. Tut las 5 fanestras da Gian Casty duain esser installadas al dretg lieu il matg da quest onn. Quai per vegnir preschentadas tar l’avertura da la nova chasa da parcar Mareg a Zuoz ils 17 da zercladur 2017.
RR actualitad 17:00