Siglir tar il cuntegn
cuntegn

Engiadina «Stress n’exista betg tar nus»

Sur ils dis da festa èn blers hotels grischuns occupads cumplattamain. Era l'hotel Waldhaus a Segl, in dils pli nobels hotels dal Grischun, ha chasa plaina. Quai munta bler stress per ils collavuraturs. In stress ch’il giast na dastga per tut pretsch betg sentir.

Legenda: Guardar il video Davos las culissas da l'hotel Waldhaus a Segl. Durada 02:55 minutas.
Or da Telesguard dals 27.12.2018.

L'hotel Waldhaus a Segl è occupà cumplettamain dapi Nadal e fin suenter Bumaun. Davos las culissas han ils collavuraturs ils mauns plains da far. Tuttina manegia l’anteriur directur da l’hotel, Felix Dietrich: «Il stress n‘exista betg tar nus. Il giast è qua per giudair il ruaus. Perquai na mussain nus nagin stress anoravers.»

Restar amicabels e rir

La giuvna emprendista Gianna Gini lavura dapi sis stagiuns a la cassa da l'hotel Waldhaus a Segl. Ella vesa mintga di quant blers daners ch’ils giasts pajan per star en l'hotel. I saja perquai fitg impurtant dad adina restar amicabels ed ademplir mintga giavisch ch’il giasts hajan. Tar 280 letgs capita quai spert che Gianna Gini na fa strusch pausas durant il di da lavur. Tuttina saja bel da lavurar durant ils dis da festa, ils giasts hajan savens buna luna e dapli temp.

Quasi 300 tschainas mintga saira

En cuschina lavuran 24 persunas per pupragnar ils giasts culinaricamain. Amos Tuor da Sumvitg fa dapi 6 stagiuns part dal team. Il stress è nagut nov per el. Era sch'i dettia temps cun bler stress, fin ussa saja quai adina gartegià insaco. El lavuria pli gugent, cura ch’i giria bler che cura ch’ins haja nagut da far.

RTR Telesguard 17:40