La situaziun actuala n’è betg simpla per firmas da construcziun. Ils pretschs da material sa midan di per di, tar tscherts materials exista ina mancanza. La firma Fedi d’Ardez ha perquai midà sia strategia, di Gian Reto Fedi, il manader da l'interpresa.
Nus avain empustà il december da l’onn passà isolaziun per quatter objects per far la lavur l’avrigl.
Sfida finanziala e logistica
Per insumma pudair finanziar il material gia mais avant che pudair far la lavur, stoi esser avant maun liquiditad. Plinavant varieschian ils pretschs da tscherts materials per var 10 – 70%, uschia Gian Reto Fedi. Da cumprar ordavant il material pretendia er in magasin adattà. Gian Reto Fedi ha chattà soluziuns cun ils furniturs, da pudair deponer il material enfin ch’el vegn propi duvrads . Tenor l’um d’Ardez vul quai ina buna communicaziun e collavuraziun. Malgrà la situaziun cumplitgada vesa il manader da la fatschenta er ina vart positiva. Numnadamain saja sa calmada la hectica. Gist avant Nadal, cura ch’i dettia auters onns ina gronda hectica saja quai quest onn auter. La glieud haja er encletga per la situaziun.
Sumegliantas sfidas en Surselva
Er la firma Beer da Rabius percorscha las stretgas da material. Per tscherts products, sco per exempel isolaziun, dovri quai pazienza. Per part stoppian ins spetgar tranter quatter e tschintg emnas, di Sigis Schmed il manader da fatschenta. Quai saja bain difficil ma tuttina sajan els uss disads da far ad ura las empustaziuns. En in cas haja el gia stuì empustar il material avant ch'esser segir sch’il project da construcziun vegn era en lur mauns. Ina situaziun excepziunala, accentuescha Sigis Schmed.
Co quai sa sviluppescha vinavant è grev da dir. Ma pussaivel ch'i va onns enfin ch'ils pretschs ed il temp da spetga sa normaliseschan.
Situaziun sa meglierada in zic
Er tar l'interpresa Loretz a Sedrun sajan ins fertant sensibilisà per il problem, di Guido Friberg, il manader da fatschenta. Las stretgas da material fetschian d’ina vart pli grev da planisar, ma da l'autra vart saja l'avantatg d'uschia avair per part pli baud sin maisa ils plans. Avant la pandemia eri quai savens da spetgar sin plans u autras chaussas. Er sa midads sajan ils pretschs per il material da construcziun, di Friberg. Quels sajan pli auts ch'anc avant la pandemia. Sco ils furniturs hajan confermà vegnian quels era a restar pli auts. Sche quai saja giustifitgà na possian ins betg dir, sch’ins saja a la fin da la chadaina, uschia il manader da la fatschenta da construcziun.
La finala sto mintga interpresa cumprar il material necessari. Sche quel vegn pli char, sto la finala il patrun d’ina chasa en construcziun pajar quels custs.
Propostas per il futur
En l'avegnir duain firmas puspè avair magasins e betg lavurar tenor il concept «just in time», che funcziuna cun empustaziuns sin basa da projects, quai di Andreas Felix, manader da l'Uniun grischuna d'impressaris. Vinavant duain novs contracts resguardar ils pretschs dinamics, uschia che quels vegnan dividids tranter impressaris e proprietaris. Na l'ultim duai era la reutilisaziun da materials or da construcziuns veglias giugar in rolla pli gronda.
