Il mardi sajan represchentants da la vischnanca e dal turissem da Scuol sesids ensemen cun glieud da «Tourplus». Quels spetgan en emprima lingia giasts gidieus. Quels vegnan a nizzegiar il cumenzament dentant sulet ina part da l'hotel cun 220 letgs.
L'hotel Palace è vegnì renovà dapi il 2013. Oriundamain han ins vulì avrir l'hotel gia il 2016. Uss duai vegnir avert la stad. Tenor il promotur d'economia da Scuol, Niculin Meyer, saja quai stà ina surpraisa. Avant l'inscunter da mardi n'hajan ins gì nagin contact tranter il possessur, Tourplus e la vischnanca. I saja planisà a fitg curta vista ed uss saja anc da guardar, tge lubientschas d'administraziun che sajan necessarias e da survegnir quellas tant pli svelt.
Hotel vegn manà koscher
Tenor ina collavuratura da Tourplus na vegnia betg a dar be giasts gidieus strict ortodoxs, mabain er giasts moderads da tut il mund, ha infurmà Meyer. Sin la pagina d'internet da Tourplus figureschia Scuol gia sco destinaziun da stad. Quai munta che las dumondas administrativas ston vegnir scleridas entaifer in mais, per ch'il manaschi possia cumenzar la stad.
Bleras dumondas anc betg scleridas
Il curt temp da preparaziun porta intgins problems. Per exempel n'èsi ad uschè curta vista betg pussaivel da porscher als giasts in access ad in bus local. Las cundiziuns na sajan uschia betg optimalas. Plinavant na sajan pliras chaussas er betg en la responsabladad da la vischnanca – per exempel las lubientschas da lavur per persunas che n'èn betg da l'Europa. Ils collavuraturs ha Tourplus sez. Il dumber vegn a depender da las reservaziuns. Plinavant n'ha Tourplus er betg pudì dir quantas persunas che stuessan far reservaziuns, per ch'il manaschi saja rentabel, damai ch'el n'ha anc naginas experientschas a Scuol.
RR novitads 06:00
