L’uffizi da concurs lascha ingiantar las immobiglias dal whistleblower Adam Quadroni ils 30 da matg. Quai resulta dal Fegl uffizial dal chantun Grischun. L'emprim termin avant dus onns aveva Adam Quadroni contestà cun success.
Ses advocat aveva reclamà che l'ingiant saja amez la stad ed a curta vista. E perquai na saja betg pussaivel da survegnir bunas offertas. Ussa ha l'Uffizi da concurs Engiadina Bassa / Val Müstair clamà a l'ingiant.
Ingiantads vegnan 5 objects dad Adam Quadroni
- La chasa a Ramosch «Avant Porta» vegn ingiantada cumprais ina part da la garascha ed il prà sin ina parcella da 1'871 m². L'uffizi da concurs parta d'ina valita da 2,3 milliuns francs. Avant dus onns era la stimaziun anc tar bun 1,7 milliuns francs.
- Latiers vegnan duas parcellas da prads cunfinants cun la parcella da la chasa. Ina cun 360 m² – l'autra cun 412 m². Tenor l'uffizi cun la valita da 5'400 francs – respectivamain 6'180 francs.
- In'ulteriura parcella è la chamona da chatscha e conturn sin ina parcella a «Ruinains» da 160 m². La chamona vegn ingiantada ensemen cun il prà «Davo Dieu» da 230 m² en ina valita totala da 100'000 francs.
- E la fin anc in prà a «Chilcheras» d'ina surfatscha da 2'980 m² cun ina valita da 2'458 francs.
-
Bild 1 von 4. La chasa annexa a la chasa paterna dad Adam Quadroni. Bildquelle: Heller & Partner.
-
Bild 2 von 4. La chasa paterna e la chasa annexa che vegnan ingiantadas. Bildquelle: Heller & Partner.
-
Bild 3 von 4. La chamona da chatscha a Ruinains. Bildquelle: Heller & Partner.
-
Bild 4 von 4. La chamona da chatscha sur Ramosch. Bildquelle: Heller & Partner.
Adam Quadroni ha svelà il cartel da construcziun
Adam Quadroni aveva fatg enconuschent cunvegnas da pretsch sistematicas ed illegalas en la branscha da construcziun grischuna. In cas ch'ha chaschunà grondas inquisiziuns da la cumissiun da concurrenza WEKO, e pli tard era inquisiziuns d'ina cumissiun d'inquisiziun parlamentara PUK en il Grischun.
Naginas indemnisaziuns per Quadroni
Talas proceduras e renfatschas – però era proceduras privatas ch'èn suandadas – avevan chaschunà blers custs, era al whistleblower Adam Quadroni sez. Oz è el senza entradas – persuenter debits. Perquai vegnan ses bains ussa ingiantads. Il favrer aveva la regenza decidì da pajar naginas indemnisaziuns ad Adam Quadroni per ses merets cun svelar il cartel e per ils daners ch'il chantun ha pudì spargnar uschia. L'argument da la regenza è ch'i na dettia nagina basa legala per tals pajaments. Quai aveva la regenza decidì suenter ch'ina petiziun era vegnida inoltrada il december 2024 tar ella – ina petiziun che pretendeva indemnisaziuns per Adam Quadroni.