Ils 16 d'october aveva pers Gabriella Binkert Becchetti da la Partida populara svizra PPS il cumbat electoral per il presidi da la Val Müstair.
Rico Lamprecht da la Partida burgais democratica PBD è vegnì elegì sco nov president communal cun 19 vuschs avantatg sin Binkert. Suenter la sconfitta aveva Binkert ditg ch'ella sa retiria da la politica locala.
Binkert candidescha tuttina
Gnanc in'emna pli tard èsi dentant cler: Binkert candidescha tuttina per la suprastanza communala. Quai mussa la glista uffiziala da la vischnanca cun ils candidats per l'elecziun dals 6 da november che la populaziun ha retschavì cun il material da votaziun. Ils candidats che han vulì esser sin questa glista han stuvì annunziar las candidaturas enfin ils 17 d'october, in di suenter l'elecziun dal president communal.
Midà intenziun infra curt temp
Binkert ha damai midà intenziun infra 24 uras e decidì da tuttina candidar malgrà l'annunzia publica da sa retrair da la politica locala. Gabriella Binkert Becchetti n'è betg stada cuntanschibla per ina posiziun.
