Siglir tar il cuntegn

Header

cuntegn

Engiadina Susch - l'incendi è stizzà, il tren va

L'incendi da guaud tranter Susch e Lavin è stizzà. L'incendi sa ha sviluppà dad in incendi da cultira ad in incendi pli grond che ha donnegià ina surfatscha da 400 sin 500 meters, ha ditg la Polizia chantunala sin dumonda dad RTR. Il traject da tren è dapi las 20:00 danovamain en funcziun.

Plirs testimonis avevan annunzià ad RTR curt avant las 14:00 in fieu dador la vischnanca da Susch en direcziun da Lavin.

La Polizia chantunala ha confermà en il fratemp ch'igl sa tracti dad in incendi da cultira. I ardia ina spunda cun da tutta sorts bostgets e bostaglia en il lieu God Val Ota tranter Susch e Sagliains e quai sin ina surfatscha da radund 400 sin 300 meters.

Pitschens disturbis sin la via

Cun ils radund 80 pumpiers e 4 vehichels gronds eran era 2 helicopters en acziun per gidar a stizzar il fieu. Il traffic sin la via d'Engiadina era mo interrut, per ch'ils helicopters possian sgular cun l'aua da stizzar sur la via. Auters disturbis n'haja igl betg dà.

La lingia da la Viafier retica era interrutta enfin las 20:00

Tgi che vuleva viagiar vers e da l'Engiadina Bassa ha gì da far quint cun retards u trens che na viagiavan betg. Viagiaturs vers l'Engiadin'Ota u a Zernez avevan da viagiar via Cuira - Tusaun.

In purtret da tut la spunda che fima.
Legenda: Cun tuttas forzas en acziun - il lieu dal fieu tranter Susch e Sagliains. mad: KaPo

Sin dumonda dad RTR ha ditg Yvonne Dünser, pledadra da medias da la Viafier retica, che lur trens sappian viagiar dapi curt suenter las 20:00 danovamain senza disturbi sin ils trajects en Engiadina Bassa.

Motiv dal fieu anc en il stgir

Tenor la Polizia chantunala è il motiv per il fieu enfin uss anc betg enconuschent.

RR novitads 15:00+

KaPo/RTR/ij

Artitgels legì il pli savens

Nach links scrollen Nach rechts scrollen