En occasiun da la radunanza da delegads da l’associaziun «Swiss Snowsports» a Zuoz, surdat Riet Campell ses uffizi a Davide Codoni. Per l’Engiadinais va cun quai a fin ina fasa da vita, nua ch’el è pendulà mintg’emna tranter Cinuos-chel e Berna.
Adina puspè midà il focus
Il svilup che la scola da skis svizra ha fatg ils ultims trais decennis è tranter auter er d’engraziar ad el e ses team, uschia Riet Campell. Surtut il midament dal focus da magister da skis, sin il sport da naiv polisportiv cun las disciplinas snowboard, telemarc e passlung. Il proxim pass pudess perfin ir en direcziun d’ina guida ch'è simplamain responsabla per il sport or en il liber.
In temp intensiv
Riet Campell era vegnì elegì il 1991 al timun da l’associaziun svizra. Durant ses temp èn s'unidas pliras organisaziuns ed er differentas certificaziuns èn il resultat da ses engaschament. Entant è l’associaziun sa sviluppada e quinta oz 14'000 commembers singuls e 154 scolas da skis e snowboard svizras.
El saja cuntent da pudair surdar ussa la batgetta en novs mauns, di Riet Campell che accumplescha proxim onn ses 65avel anniversari.
Jau ma legrel sin in temp, cura che l’agenda na dicta betg pli tut mes di.
Tema ch’el pudess avair lungurella suenter il temp a Berna tar Swiss Snowsports, n’ha l’um sportiv betg. El è persvadì ch’i dat avunda pussaivladads per s’occupar er en Engiadina.
Ord l'archiv:
RR actualitad 11:00