Siglir tar il cuntegn

Header

cuntegn

Engiadina Temp d'uffizi dal president da San Murezzan duai vegnir limità

La suprastanza communala ha elavurà la constituziun communala e lantschà il temp da consultaziun. Nov fiss definì cler, quant ditg ch'ina persuna po presidiar la vischnanca da San Murezzan.

En la versiun da la constituziun communala dal 1978 n'è anc betg defini, quant ditg ch’ina persuna po restar a la testa da la vischnanca da San Murezzan. Insumma duai il palpiri da passa 40 onns vegnir adattà cumplettamain al temp dad oz. Cun la nova versiun da la constituziun duessan surtut vegnir simplifitgadas las proceduras tar las elecziuns ed augmentadas la cumpetenzas dal cussegl communal, uschia ch’ins possia evitar votaziuns e referendums inutils a l’urna.

Cumpetenzas dals gremis

La nova constituziun prevesa che la radunanza communala da San Murezzan avess be pli la cumpetenza da fixar il pe da taglia ed approvar il budget da la vischnanca. Ils dretgs finanzials dal parlament percunter duain vegnir augmentads. Per singulas missivas duai be pli valair il referendum facultativ.

Fin uss dovri 500 suttascripziuns per lantschar in’iniziativa dal pievel. Da nov duai quella vegnir curregida sin 200 suttascripziuns. En pli fissan ils commembers dals dus gremis – parlament e suprastanza – obligads da declerar avertamain lur colliaziuns d’interess.

Dretg da vuschar per esters

Abitants da San Murezzan cun in permiss da dimora C (persunas che abitan almain 5 onns en vischnanca) duain pudair votar e vuschar en avegnir. Ultra da quai duai la procedura d’elecziun vegnir scursanida. Nov elegess il parlament il cussegl da scola e la cumissiun da gestiun da San Murezzan.

Mesemna saira, ils 17 d'avrigl 2019, vegn la constituziun preschentada al public en ina sairada en l'Hotel Reine Victoria a San Murezzan. La populaziun po prender posiziun en chaussa fin la fin da zercladur da quest onn.

RR novitads 06:00

Artitgels legids il pli savens