Il runal principal «Alp da Munt» dal territori da skis Minschuns en la Val Müstair è ord funcziun. Quai pervi dad in donn dal rodam, sco Hans Rupp, commember dal cussegl administrativ ha ditg ad RTR. Il donn saja uschè grond, ch'ins haja decis da remplazzar il runal. Quai dovria però temp, ed ins possia far quint pir la proxima stagiun d'enviern cun ina reavertura. Cunquai ch’in transport da la staziun a val enfin tar il segund runal «Vallatscha» n’è betg garantì, resta era quel serrà.
Tras quest donn restan dus terz da noss territori da skis salda. Il runal donnegià è il cor da Minschuns.
Program alternativ per la scola da skis
Avert resta il lift d'access che maina tar l'ustaria «Alp da Munt» ed era la scola da skis saja garantida fin la fin da la stagiun. Malgrà l’incap n’hajan betg blers giasts annullà la scola da skis. Per ils uffants ha la scola da skis elavurà in program spezial. Tenor il directur, Augustin Oswald, dettia la damaun lecziuns da skis ed il suentermezdi sajan planisads differents gieus, curs da lavinas ubain far passlung u turas da skis. Tenor Daniel Pitsch saja garantida la stagiun cun la purschida reducida fin ils 6 da mars 2022. Suenter vegnia la situaziun valitada danovamain.
