Sco l’Uffizi da chatscha e pestga communitgescha, ha in chatschader fatg sin il territori da Zernez ina fotografia d’ina luffa-tscherver cun dus pitschens. Il chatschader era ils 22 da fanadur tard la saira vi d’observar selvaschina.
I sa tracta da l’emprima cumprova segira da pitschens lufs-tscherver en l’Engiadina, dapi che la spezia d’animal era vegnida extirpada là en la segunda mesadad dal 19avel tschientaner. Gia l’onn passà avevan chatschaders annunzià d’avair vis pitschens lufs-tscherver, lura mancavan dentant mussaments segirs.
Circa l'onn 1872 han ins extirpà il luf-tscherver en l'Engiadina Bassa. Uss viva dapi almain trais onns in luf-tscherver mastgel permanentamain en il territori enturn Zernez. L'identificaziun da la femella cun ils pitschens haja anc da succeder, scriva il chantun en sia communicaziun.
Nova situaziun en l'Engiadina
Sin dumonda dad RTR ha il collavuratur scientific da l'Uffizi da chatscha e pestga dal Grischun, Arno Puorger explitgà curtamain la parallela tranter il svilup en la Surselva e quel en l'Engiadina.
