Damai ch'i n’è betg lubì da far naiv artifiziala en il guaud da Staz, ina regiun che fa part da l’Inventari federal da las cuntradas e dals monuments natirals d’impurtanza naziunala, han ils organisaturs gì da trair in’autra lingia per il traject da cursa. Nov maina quel uss directamain da Schlarigna tras il guaud da Staz a Puntraschigna, senza far in gir si San Murezzan ed enavos.
Engaschament ed agid da tuts
Cun quai han ins gì da scursanir il traject per 10 km sin anc 55 km. Per insumma pudair garantir cundiziuns optimalas, èn surtut las vischnancas da la regiun tranter Puntraschigna e S-chanf s’engaschadas cun maschinas e lavurers, ch’ellas han mess a disposiziun per far e manar nà naiv. Senza quella solidaritad demussada durant las ultimas emnas, na fiss ina realisaziun da «La Diagonela» betg pussaivla quest onn, ha suttastritgà il president da l’organisaziun, Ramun Ratti.
30% curriders da la Svezia
Quint fan ins cun radund 750 passlunghists per la cursa en il stil classic. Radund 35% dad quels sajan svizzers, ina gronda part deriva però dals pajais dal nord.
Sper la cursa classica che parta e finescha a Zuoz, datti anc la versiun pli curta «La Pachifica» da radund 30 km cun partenza a Puntraschigna. Cun «La Diagonela» vul ins attrair passlunghists en Engiadina, che sa preparan per la «Marcialonga» che ha lieu in'emna pli tard en Italia.
«La Diagonela 2016» parta la sonda, ils 23 da schaner a las 09:15 davent dal center da passlung a Zuoz. La partenza per «La Pachifica» è a las 09:00 a Puntraschigna.