La Tessanda Val Müstair fabritga in nov bajetg, in'investiziun da radund 10 milliuns francs, uschia l'infurmaziun da l'architect Peter Zumthor durant la conferenza da medias a Sta. Maria. Actualmain è l'edifizi da la Tessanda Val Müstair situà amez Sta. Maria. El è stretg, malcumadaivel e betg effizient. Plinavant saja la chasa er enorm canerusa, explitgescha la presidenta da la fundaziun Tessanda Val Müstair, Maya Reppele. Dapi 66 onns è la Tessanda en ina chasa engiadinaisa ch'è gia passa 300 onns veglia.
Cun in fabricat da l'architect da renum mundial Peter Zumthor sa mida quai fundamentalmain.
En avegnir vegn la Tessanda ad avair in public interessà per il mastergn e plinavant era per l’architectura.
-
Bild 1 von 4. Maya Reppele, presidenta e manadra da gestiun da la Tessanda. Bildquelle: Jon Duschletta, Posta Ladina.
-
Bild 2 von 4. Il nov edifizi a Valchava duai vesair or tenor quest model. Bildquelle: RTR.
-
Bild 3 von 4. Peter Zumthor è l'architect dal nov edifizi. Bildquelle: RTR.
-
Bild 4 von 4. Bildquelle: RTR.
En il nov bajetg che vegn fabritgà a l'ur da Valchava, è era previs ina cafetaria e locals per dar curs. Actualmain lavuran 18 collavuraturas en la Tessanda Val Müstair, da quellas èn trais en scolaziun. Per part hajan enfin quatter collavuraturas da lavurar en il medem local. En avegnir vegni a dar bler dapli spazi per ellas, declera la presidenta da la Tessanda Val Müstair. Ch'in architect da renum s'engascha per in project pli pitschen, en la Val Müstair na sa chapeschia betg da sez. Per Peter Zumthor è quai dentant in project da cor.
Quai n'è betg in project modest, la qualitad na vegn numnadamain betg mesirada per mauns da la grondezza. E la Tessanda è anc bler memia pauc enconuschenta, perquai hai jau ditg subit gea.
L'avertura dal nov bajetg a Valchava è previsa la primavaira 2028. Quai ad occasiun dal 100avel giubileum da la manufactura Tessanda Val Müstair.