Tge «Biosfera» tschertga uss in nov manader?

Betg il Parc da natira Biosfera Val Müstair, mabain il Reservat da biosfera Engiadina Val Müstair tschertga in manader da gestiun.

Purtret da la structura dal Reservat da biosfera Engiadina Val Müstair. Bild in Lightbox öffnen.

Legenda da maletgs: La structura dal Reservat da biosfera Engiadina Val Müstair. RTR/Grafica

inserat Avrir maletg en lightbox.

Legenda da maletgs: L'inserat per il manader da gestiun dal Reservat da Biosfera Engiadina Val Müstair RTR/David Spinnler

Il Reservat da biosfera Engiadina Val Müstair tschertga in manader da gestiun cun in pensum da 40%. Tar questa plazza na sa tracti dentant betg dal manader da gestiun dal parc da natira Biosfera Val Müstair. Là avevi dà diversas midadas durant ils ultims onns.

Il Reservat da biosfera è l'organisaziun tetgala dals trais partenaris Biosfera Val Müstair, Parc Naziunal e nov era la vischnanca da Scuol che porscha ina part da la zona da tgira enturn il Parc Naziunal e che ha er ina zona da svilup a S-charl. Scuol fa da nov part dal Reservat da biosfera per empruvar d'ademplir las cundiziuns da l'Unesco per ch'il Reservat da biosfera possia mantegnair il label da l'Unesco (guardar grafica).

Il nov manader da gestiun dal Reservat da Biosfera Engiadina Val Müstair duai coordinar ils trais partenaris, far la lavur per il dossier da l'Unesco e negoziar cun il chantun e cun la Confederaziun. Tar il parc da natira Biosfera Val Müstair èn ins da l'avis che la Biosfera Val Müstair avess pudì far questas lavurs senza crear in'ulteriura plazza. Flurin Filli dal Parc Naziunal, che ha enfin ussa fatg la lavur administrativa per il Reservat da biosfera dasper sia lavur ordinaria, è dentant da l'avis ch'i dovria in nov manader da gestiun. I saja impurtant ch'era projects a Scuol vegnian sviluppads e ch'ina persuna possia sa concentrar sin la lavur per pudair mantegnair il label da l'Unesco per il Reservat da biosfera.

RR actualitad 12:00