Siglir tar il cuntegn

Header

cuntegn

Engiadina Thomas Nievergelt è nov a la testa dal Museum Engiadinais

Il Samedrin ha surprendì da Gian Duri Ratti il presidi da la Fundaziun Museum Engiadinais. Cun quella midada fiss er liber in sez en il cussegl per in represchentant da la Regiun Malögia.

Il Museum Engiadinais è stà fin la fin dal 2017 chaussa dal Circul d’Engiadin’Ota e cun quai – tenor statuts – il landamma actual er a la testa dal museum. Suenter l’aboliziun dal circul è vegnida fundada la Fundaziun Museum Engiadinais.

Bun mument per midada

Per Gian Duri Ratti, ch'è stà president ils ultims set onns, saja uss il dretg mument per far il pass e dar il timun en novs mauns. Thomas Nievergelt era gia fin uss commember dal cussegl da fundaziun e sappia da tge ch’i sa tractia, uschia Ratti. Durant ses temp en uffizi è il Museum Engiadinais er vegnì sanà intensivamain ed equipà cun ina nova inscenaziun da glisch.

En tut ha la regiun investì 6 milliuns francs en il Museum a San Murezzan.

Nova furma da responsabladad

Cun la midada en il cussegl da fundaziun, che consista da fin tschintg commembers, dettia uss er la pussaivladad che la Regiun Malögia elegia in represchentant en il gremi. Dapi quest onn survegn il Museum Engiadinais numnadamain ils 250’000 francs sustegn l’onn en furma da cunvegna da prestaziun cun la Regiun Malögia. Il consentiment per quella ha da dar mintga singula vischnanca.

La surdada da presidi dal cussegl da fundaziun han Gian Duri Ratti e Thomas Nievergelt fatg en la miraglia dal Museum Engiadinais a San Murezzan il venderdi saira cun in act uffizial.

RR novitads 21:00

Artitgels legids il pli savens