Radund 180’000 kilometers sin il mar, passa 20’000 kilometers cun il velo u era a pe e visità finalmain radund 120’000 uffants e giuvenils en scolas e universitads. Lur finamira – sensibilisar la generaziun futura davart ils problems e sfidas dal clima.
Ils uffants han 100% creativitad – perquai duess ins dumandar els sco schliar ils problems dal clima.
Dapi l’onn 1999 èn els en viadi. Durant quel temp han Dario Andri e Sabine Schwörer maridà e gì sis uffants.
Cumenzà ha tut cun ina tura a pe tras la Svizra e cun muntar sin il pli aut piz da mintga chantun. Suenter quella expediziun han els vulì s’engaschar sin tut il mund. Cun il project TopToTop han els alura fatg il viadi cun la finamira da muntar era ils pli auts pizs dal mund.
Ussa, suenter 20 onns, va il viadi plaunet a fin. Els èn sin tschertga d’in dachasa, lur giavisch fiss da viver en Engiadina Bassa.
RR actualitad 11:45