Ina summa da maximal 1,3 milliuns francs metta il chantun a disposiziun per renovar las lavineras che protegian il vitg da Zuoz. I sa tracta da la segunda etappa dal project. Las lavineras da Albanas èn sur il vitg. Radund 65% da las punts da naiv èn fatgas da betun ed èn vegnidas construidas ils onns 1950/60. Las novas èn fatgas d'atschal. Cun las controllas annualas han ins constatà donns en il betun. Ils ultims onns èn quels s'augmentads uschè ferm ch'igl è da remplazzar las construcziuns da betun.
En l'emprima etappa han ins gia remplazzà 1'600 meters da las punts da naiv. Cun la segunda etappa vegnan sanadas ulteriuras construcziuns da betun ed i vegnan anc serradas largias ch'eran fin uss avertas.
Mesiras per augmentar segirezza da la via
Ina contribuziun chantunala da 195'000 francs ha la regenza approvà per proteger la Via Engiadina datiers da Lavin. Quai succeda cun construir ina pitga per siglientar lavinas en la Val Punia. Ils ultims onns han ins gia installà pliras talas pitgas sin il traject. La lavina da la Val Punia è anc l'ultima che chaschuna in privel sin il traject tranter Lavin e Scuol. Il project duai vegnir realisà anc quest onn. Uschia po la segirezza sin la via vegnir augmentada fitg ferm.
