Tour de Ski vinavant en Val Müstair

La suprastanza communala da la Val Müstair ha decidì da sustegnair vinavant l'organisaziun d'etappas dal Tour de Ski en Val Müstair. Quai schebain che l’occurrenza è il mument senza comité d’organisaziun.

Laschar ir video «La Val Müstair less salvar il Tour de Ski»

La Val Müstair less salvar il Tour de Ski

1:58 min, Telesguard dals 8.12.2017

Era en l'avegnir vul la vischnanca da Val Müstair sustegnair finanzialmain l’etappa dal Tour de Ski en Val Müstair. Ina da las occurrenzas las pli enconuschentas en il sport da passlung. Pia in signal cler envers il comité d’organisaziun ch'è actualmain senza timun. Avant diesch dis avevan plirs commembers dal comité d’organisaziun, tranter quels il president e vicepresident, demissiunà ord motivs nunenconuschents.

Finamira è da furmar in nov comité

Uss è la balla dentant puspè tar ils organisaturs. Clà Filip Pitsch, il president dal comité retratg, ha ditg envers RTR ch’ins saja ussa vidlonder da furmar in nov comité d’organisaziun. Sch'el faschess puspè part da quest nov comité è dentant anc avert.

La proxima etappa dal Tour de Ski en Val Müstair è planisada l'emprim da schaner 2019.

RR novitads 12:00