La tradiziun preveseva in viadi tras la fracziun da Guarda, ma senza chor n’è quai betg pli pussaivel. Ussa ha il president dal chor Antonio Dias prendì l’iniziativa e fatg flyers tras la vischnanca. Radund 30 persunas s'èn annunziadas per questa acziun.
Il basegn da s’inscuntrar è grond
Quai è segir in dals motivs. Suenter la pandemia vul la populaziun puspè s’inscuntrar e chantar da cumpagnia. Ensemen cun il dirigent Armon Schlegel s'èn giuvnas e vegls da Guarda radunads ed han emprais chanzuns tradiziunalas, questas chanzuns che vegnivan chantadas era gia da pli baud tras la fracziun da Guarda.
Trais provas per esser pronts
En mo trais provas han els emprais ina deschina da chanzuns. Impurtanta è la cumpagnia ed il far insatge ensemen, quai è la tenuta. Ils 27 da december va ussa tut la cumpagnia tras la vischnanca a chantar. Ina veglia tradiziun da Guarda è puspè renaschida.