Tradiziun, chant e cuminanza - Chalandamarz – l’usit tradiziunal dal Grischun

Il Chalandamarz tutga tar ils usits ils pli impressiunants e vivs dal Grischun. Mintg’onn van las scolaras ed ils scolars cun stgellas, giaischlas e chanzuns tradiziunalas da Chalandamarz tras las giassas per stgatschar simbolicamain l’enviern e beneventar la primavaira.

Per ils uffants indigens è quest di in dals pli impurtants da tut l’onn – in’isanza viva, che n’ha fin oz pers nagut da sia fascinaziun.

Live da la partida al Chalandamarz a Zuoz 

Avrir la box Serrar la box

Per tut quellas e quels che na pon betg suandar quest spectacul al lieu emetta RTR il cortegi a partir da las 10:40 sco livestream.

Oceana Galmarini e Romana Costa mainan tras l’emissiun, cun elements en tut las quatter linguas naziunalas.

Chalandamarz: muntada ed istorgia

Il tierm Chalandamarz deriva dal latin «calendae». Ord quest pled è sa sviluppà il pled rumantsch «Chalanda». Quai munta «ils emprims dis d'in mais». Malgrà che l'usit vegn be pratitgà en intginas valladas grischunas è el enconuschent lunsch enturn.

Grazia al cudesch d'uffants «Uorsin» da Selina Chönz cun illustraziuns dad Alois Carigiet, ch'è stà in bestseller, è il Chalandamarz vegnì renumà internaziunalmain.

Zuoz – in Chalandamarz tut spezial

Mintga vitg festivescha il Chalandamarz en sia moda – a Zuoz è l’isanza spezialmain viva. Il cortegi maina in di e mez tras Zuoz e Madulain e culminescha mintgamai il 1. da mars sin la plazza da scola en il center dal vitg da Zuoz – in mument che attira mintg’onn rotschas d’aspectaturas e d’aspectaturs e che procura per muments da pel-giaglina tar pitschen e grond.

Impressiuns dal 2025