Siglir tar il cuntegn

Traffic Sta. Maria Svelt, sveltischem – traffic e peduns tras il vitg

Per meglierar la situaziun da traffic durant la stagiun auta vegn reglà il traffic tras Sta. Maria, quai chaschuna plaschair ma era disgusts.

Fin 5’000 vehichels per di tras la via stretga, cun be in vial, tras Sta. Maria. Gia l'onn 1997 è la populaziun sa decidida per in sviament ed il 2013 anc ina giada. Fabritgà n'è anc nagut, la populaziun spetga anc adina sin in sviament.

Durant la stad, la stagiun auta, vegn reglà il traffic tras persunas da segirtad. Concret vul quai dir ch'il traffic che vegn dal pass Umbrail, quel dal pass dal Fuorn e quel nà da l’Italia vegn fermà a l’ur dal vitg ed adina be in access a la giada vegn dà liber. Uschia na blochescha il traffic betg sa sez tar las passaschas fitg stretgas. Per ils töffists ed automobilists vul quai dir, spetgar in per minutas e lura via libra.

Auter è quai per ils peduns. Els ston spetgar cur che las undas da motors vegnan e currer svelt tras il stretg avant che la proxima lavina vegn, raquinta Rodolfo Knapp.

E lura currer tut quai ch'i va!
Autur: Rodolfo Knapp

Per peduns saja la situaziun sa pegiurada, manegian pliras persunas che raquintan ad RTR co ch'els vesan la situaziun.

La via è libra e lura vegnan ils autos cun in tempo tras il vitg, ma per ils peduns n'èsi betg meglier.
Autur: Peider Andri Moor

Che quai na saja betg LA soluziun san tuts. Perquai cumbattan las autoritads vinavant per la soluziun cun in sviament.

Igl è stretg

RTR actualitad 08:00

Artitgels legids il pli savens