Il tir cun l'artg a chaval era oriundamain ina furma da cumbat. Ozendi è quai in sport che vegn adina pli popular. Il Zuozingher Andri Marugg ha cumenzà avant dus onns cun quest sport e tutga oz tar ils megliers artgers a chaval en Svizra. La fascinaziun dal tir cun l'artg a chaval è per l’um da 39 onns d’emprender adina puspè novas tecnicas e da vegnir adina meglier.
L’a e l’o saja però la fiduzia tranter il chaval ed il chavaltgader. Numnadamain vegn chavaltgà a maun liber uschia ch’ins ha liber ils mauns per trair las frizzas. Natiralmain stoppian ins er esser in bun tregant e perquai investescha Andri Marugg bler temp en il trenament. Dumandà è pia precisiun, coordinaziun e sveltezza il medem mument.
Maister Balaister
Andri Marugg ha organisà l’emprim turnier da trair cun l'artg giu dal chaval «Maister Balaister» a Zuoz en Engiadin’Ota. Annunziads èn 27 participants che sa mesiran en il percurs nua ch’i va per chalar schibas ed animals. Il turnier ha lieu dals 14 enfin ils 16 d’avust.