- Trais morts ed ina giuvna blessada grevamain tar crudada d'aviun.
- Tar l'aviun crudà sa tracti d'in aviun pitschen.
- L’aviun è stà en l'aria en il rom d'in champ da giuvenils.
La Polizia chantunala conferma a la conferenza da medias ch'il pilot sco era dus buobs da 14 onns sajan morts tar la crudada da l'aviun pitschen sin la Diavolezza. La quarta passagiera, ina giuvna da 17 onns haja survivì. Sco Roman Rüegg da la Polizia chantunala di, saja l'aviun crudà venderdi bun'ura en la regiun da la Diavolezza. La polizia haja survegnì in'annunzia d'accident da las 9.30 uras.
Plinavant conferma la polizia ch'il sgol haja gì lieu en connex cun in champ da giuvenils da Aero Club Svizra. Dapli tar il motiv da la crudada da la Piper PA-28 è anc betg enconuschent.
Per Yves Burkhardt dal Aero Club saja il mund dà ensemen cura ch'el haja udì da l'accident. A la famiglia dals pertutgads drizza el ora sia condolientscha e giavischa buna guariziun a la giuvna blessada. Tar Aero Club n'haja quai anc mai dà in accident uschè tragic. Ils ulteriurs giuvenils dal champ vegnian tgirads d'in Care Team. Il champ che giaja a fin damaun vegnia betg interruts, uschia Burkhardt.
Christian Gartmann da la gruppa da sgols da motors da l'Engiadina Auta di ch'il pilot da la maschina saja stà in pilot indigen cun gronda experientscha. Tar il sgol dad avantmezdi hajan ins vulì mussar als giuvenils la lavur da pilot e dar la pussaivladad da sgular ina giada. I na saja betg stà in sgol da risico.
RR novitads 12:00+